5. Balat

Madami sa atin ang may masasarap na pubic ha…este..puberty.  Ang favorite part ko dito ay ang pagtubo ng mga mala-bulkan na nana sa ating mga mukha.

Pinanganak tayong makikinis ang pisngi.  Lagi silang kinukurot ng mga Auntie at Uncle natin tuwing sila’y bibisita sa bahay tuwing linggo ng tanghali.  Magkakamay, kakain ng inihaw na liempo at tahong, hindi magpupunas at pipisil sa ating mga pisngi.  “Ang cute naman ng pamangkin ko!!!”

Pagdating ng hayskul o kahit sa grade 6 pa lamang, ay ayan na!  Magsisitubuan na ang mga putanginang pimpols na yan!  Malaki, mapula at may hinog na nanang dilaw sa gitna!  May tatlo sa kanang pisngi, apat sa kaliwa at ang reyna ay nasa dulo ng ilong mo.  Utong sa ilong?  Haay… Ikanga ni Ruffa, “Diyahe to death!”

Mahilig mang-asar ang pimpols ko.  Lagi siyang tumutubo isang oras bago ako magsalita sa harap ng klase at bago ako makipag-”eyeball” sa ka-penpal kong si Larissa.  Tuwing nangyayari ‘to ay napapabuntong hininga na lang ako at napapatingin sa itaas, “Diyos koh!  Bakit ngayon?  Bah-khit ngayooon??!!!!!!!” (sabay pasok ng soundtrack ng Ula: Ang Batang Gubat, “…malayu pa, ang umaaagaaa….di matanaw, ang pag-asaaaah…”)

Ang nakakainis sa mga pimpols ko pa ay hindi ito matanggal-tanggal ng Eskinol!  Kahit Master by Eskinol, ayaw!  Kahit C.Y. Gabriel, ayaw!  Kahit Likas Papaya, ayaw!  Kahit Perla na banayad sa kamay, ayaw!  Parang gusto ko na nga pahiran ng Cebo De Macho yung mukha ko dahil nagmumukha nang isang malaking peklat sa kakagamit ng kung anu-ano eh!

Siyempre, bilang mga batang-kalye ay wala kaming pera para magpa-derma at actually, hindi pa ito uso no’n dahil nagsisimula pa lamang magsando-bra si Vicky Belo nung mga panahong iyon.  Kaya ang solusyon ko?  Ano pa eh di pulbos!  Mura na, tuyo pa ang kili-kili mo nang dalawang minuto!  Pagdating ng hapon, maghahalo na ang pulbos, ang oily kong mukha at ang dugo galing sa apat na pimpols kong sabay sabay pumutok!  Daig ko pa ang mukha ni Hesus noong Biyernes Santo!  (Tenco, gagawa ba tayo ng blog tungkol sa Holy Week?)

Tem-i: “Babes, Pinipimpols ka ba sa mani?”

Larrisa: “Oo.”

Tem-i:  “Buti ka pa…  Ako, sa mukha e…”

- Tem-i

Tem-i parang walang epektib na pampatanggal ng pimpols ang mukha mo dati ah. Sana gumamit ka na lang ng liha at yun ang kiniskis mo sa pagmumukha mo. Siguradong tanggal ang pimpols mo.(Palaging hinihirit sa mga maraming pimpols)

Bad trip talaga yang mga pimpols na yan. Talagang walang nakakalusot diyan eh. First day ng intrams namin ng grade 6 nun. Syempre maaga ko gumising para makapunta agad sa iskul at makapagpakyut na. Pagbangon ko may nararamdaman akong masakit sa bandang kaliwa kong pisngi.

“Ay pucha! Huwaaag namaaan!”. Alam ko na agad kung ano yun eh.

Punta agad ako ng banyo para gawan ng paraan. Naghilamos agad ako at sinabon ng mabuti ang pimpol na yun. Lahat ng bula nilalagay ko lang sa pimpol ko at iniiwan lang ng mga dalawang minuto. Tapos hilamos na at kain ng almusal. Tapos ligo na at super sabon uli ng mukha. Ipon uli ng mga bula sa pimpol na yun at babad uli. Syempre ang ginamit kong sabon eh safeguard dahil naiisip ko lagi na “it kills 99.9% of germs”. Lalo na yung komersyal na kada daan ng sabon sa mukha eh pawala nang pawala ang mga pimpols sa mukha.

Pagkatapos ng ilang sabunan ng safeguard sa mukha ko, titingin na ko sa salamin upang makita kung epektib ba ang teknik ko. Tadaaann!!! Nandun pa rin siya! Mamula-mula at may nana sa gitna. Haselicious!

No choice ako at pupunta sa intrams ng may bonggang-bonggang pimpol sa kaliwang pisngi. Lalapitan ko ang crush ko pero palaging yung kanang parte ng mukha ko lang ang nakatapat sa kanya. Hindi ako masyadong humaharap sa kanya at palagi lang ako sa gilid niya. Sira ang diskarte ni noy!

Hindi naman ako gumamit ng mga eskinol na yan at kung ano man yung inendorso ni Richie Ticson na pampapogi na yan(naka-leather jacket na black habang nasa motor). Sinunod ko lang ang payo ng aking ama.

Tiktay: “O ang laki ng pimpol mo ah.”

Tikboy: “Oo nga eh hasel nga sa chicks eh.”

Tiktay: “Sabunin mo lang yan at maghilamos ka ng mainit-init ng tubig”

Tikboy: “Talaga? Epektib yun? Sige magawa nga. Dabest talaga kayo! Pengeng pang-nood ng sine.”

Tiktay: “Ulol tirisin ko yang pimpol mo eh!”

Sinunod ko naman yun at parang epektib naman. Hindi naman pinutakte ng pimpols ang mukha ko at paisa-isa lang ang sulpot niya sa pagmumukha ko. Salamat tay pero hindi ko pa rin nadeyt ng sine nun ang crush kong si Bianca.

- Tikboy

Hahaha!  Ngayon ko nalang ulit naalala ‘yung komersyal ni Richie Ticzon!  Kalakasan pa niya nun sa Shell dati e!

Hindi ko pinroblema ang pimpols, dahil kinondisyon na ko ng mga magulang ko na pagtuntong ko ng grade 6 e magkakaroon na ko nito.  At hindi sila nagkamali.  Usually, sa noo nagsisimula ‘yan.  Malamang nag-usap na sila ng bulutong kung saang pwesto sila mangungupahan dahil never pa naman silang sabay tumubo sa parehas na lugar (Tem-i, gagawa rin ba tayo ng blog tungkol sa bulutong?)

Syempre, nagsimula na ring maging oily ang gwapo kong mukha.  At tulad nga ng sabi ni Tikboy, Safeguard lang ang katapat, at tama siya!  Parang lalong lumala ang tigyawat (tagihawat) ko sa mukha.  Gustung-gusto kong tinitiris agad ‘yun lalo na kung may nana talaga.  Tapos e tatalsik ‘yun sa salamin at hindi ko na pupunasan (joke lang).

Akala ko e hanggang dun lang ‘yun.  Subalit datapuwat paggising ko isang umaga e nagkaroon na ng barkadang tumubo sa bandang gilid ng mukha ko.  Hanggang sa parang patilya na sila sa kanang parte ng mukha ko (tanginang ‘yan).

Sinubukan ko ang Eskinol ng tita ko.  Mas okay kung may granules akong makukuha at ‘yun ang ilalagay ko sa pimpols ko.  At ang resulta?  Makintab na mukha!

Pero hindi pa rin ako nawalan ng pag-asa.  May nagsabi sakin na para hindi na lumala ang pagkakaroon ng tigyawat e ‘wag nalang daw akong magsabon ng mukha, at ‘yun nga ang ginawa ko.  Mukhang epektib naman.  At least tipid ka pa sa sabon!

Pero swerte pa rin naman ako at hindi ako tinubuan ng sobrang daming pimpols at hindi nagkabutas-butas ang gwapo kong mukha.  ‘Yung titser ko sa English ganun e, ang daming mga bulkan.  ‘Yung iba naman, sa sobrang dami at lala talaga ng pimpols e sinasabihang, “Tingnan mo si _____ o, tinubuan ng mukha sa pimpols!”  Sobrang nakakapikon siguro ‘pag masabihan ka nito.

Hindi ko sinubukan ang pulbos o C.Y. Gabriel tulad ng nabanggit ng mga barkada ko.  Buti nalang at nung 17 years old na ako ay nagsimula nang humupa ang nakakainis na pimpols.

- Tenco